Gəncədə Türkiyə Cümhuriyyətinin 94-cü ildönümü qeyd edilib

8 ay əvvəl     Siyasət 0
Gəncədə Türkiyə Cümhuriyyətinin 94-cü ildönümü qeyd edilib

Türkiyə Cümhuriyyətinin elan olunmasının 94-cü ildönümü münasibəti ilə qonşu ölkənin Gəncədəki Baş konsulluğu tərəfindən bayram tədbiri təşkil edilib. GancaPost xəbər verir ki, tədbirə Gəncə şəhər İcra Hakimiyyətinin başçısı Elmar Vəliyev, Türkiyə Cümhuriyyətinin Gəncədəki Baş konsulu Orxan İşık, şəhər ziyalıları və rəsmi dairələri təmsil edən şəxslər qatılıb.

Bayram tədbirində Azərbaycan və Türkiyə Respublikalarının dövlət himnləri səsləndirilib. Sonra Türkiyə Cümhuriyyətinin prezidenti Rəcəb Tayyib Ərdoğanın Türkiyənin xarici ölkələrdəki diplomatik nümayəndəliklərinə göndərdiyi təbrik məktubu oxunub.

Türkiyənin Gəncədəki Baş konsulu Orxan İşık çıxış edərək, türk xalqının istiqlal mübarizəsindən, Türkiyə Respublikasının bugünkü inkişaf və tərəqqisindən danışıb.

Konsul qeyd edib ki, Türkiyə və Azərbaycan xalqları hər zaman bir-birinin yanında olublar. Orxan İşık Türkiyənin dost və qardaş Azərbaycanla əlaqələrinin inkişafında Gəncə şəhərinin də rolundan danışıb. Gəncənin Cümhuriyyət paytaxtı olmasını və qardaş ölkəyə dəstək vermək məqsədi ilə türk ordusunun bu şəhərə gəldiyini vurğulayıb.

Gəncə şəhər İcra Hakimiyyətinin başçısı Elmar Vəliyev tədbirdə çıxışı zamanı bildirib ki, dövlət müstəqilliyi hər bir xalqın malik olduğu ən dəyərli sərvətdir. Türk xalqı 94 il bundan əvvəl dövlət müstəqilliyini elan etmişdir. İcra başçısı qardaş ölkənin müstəqillik bayramı münasibəti ilə Türkiyə xalqını təbrik edib, inkişaf və tərəqqi arzulayıb. Elmar Vəliyev deyib ki, bir-birilərinin dövlət müstəqilliyini dəstəkləyən, həmrəylik göstərən Azərbaycan və Türkiyə arasındakı əlaqələr strateji tərəfdaşlıq səviyyəsinə yüksəlib. Ölkələrimiz və xalqlarımız arasında möhkəm tərəfdaşlığa Azərbaycanın Gəncə şəhəri ilə Türkiyənin şəhərləri arasındakı əməkdaşlıq da öz töhfəsini verməkdədir.

Oxunub : 249



    Bu xəbərə hələ bir şərh yazılmayıb. İlk şərhinizi yazın!